ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೫೧:
ಸೆಳೆಯುತಿರ್ಪುವದೊಂದು ಹೊರಬೆಡಗಿನೆಳೆಗಳೆ |
ನ್ನೊಳಗಿನಸುವೆಲ್ಲವನು ಕಟ್ಟಿನಿಂ ಬಿಗಿದು ||
ಎಳೆದಾಟವೇಂ ಋಣಾಕರ್ಷಣೆಯೋ ? ಸೃಷ್ಟಿ ವಿಧಿ |
ಯೊಳತಂತ್ರವೋ ? ನೋಡು – ಮಂಕುತಿಮ್ಮ || ೦೫೧ ||
ನಾವೆಲ್ಲ ಅಸಾಧಾರಣ ಅಂತಃಶಕ್ತಿಯ ವರ ಪಡೆದು ಭುವಿಗಿಳಿದ ಜೀವಿಗಳೆ.. ಆದರೆ, ನಮ್ಮೊಳಗಿನ ಅದ್ಭುತ ಸಾಮರ್ಥ್ಯವನ್ನೆಲ್ಲ ಕಬಳಿಸಿ ನುಂಗಿಹಾಕುತ್ತಿದೆಯಂತೆ ಬಾಹ್ಯ ಜಗದಾಕರ್ಷಣೆಯ ಹುಸಿ ಮಾಯೆಯ ಬೆಡಗು. ಗೊತ್ತಿದ್ದೂ ಗೊತ್ತಿದ್ದೂ ಆ ಬಲೆಯಡಿ ಸಿಲುಕಿ ಅಸಹಾಯಕವಾಗುವ ಹುಲು ಮಾನವ ಜೀವಿಯ ಒದ್ದಾಟದ ಪರಿ ಇಲ್ಲಿ ಪ್ರಕಟವಾಗಿದೆ.
ಹೊರ ಜಗತ್ತಿನ ಸೆಳೆತವೆನ್ನುವುದು ಸಾಧಾರಣ ಸರಕಲ್ಲ. ಆ ಬಾಹ್ಯದ ಏನೇನೊ ಬೆಡಗು, ಆಕರ್ಷಣೆಗಳ ಹಲವಾರು ಎಳೆಗಳು ಬಂಧ-ಬಾಂಧವ್ಯಗಳಾಗಿಯೊ, ಮೋಹ-ದಾಹಗಳಾಗಿಯೊ, ಆಸೆ-ಪ್ರಲೋಭನೆ-ಪ್ರಚೋದನೆ-ಕೀರ್ತಿ-
ಸೆಳೆಯುವ ಈ ಸೆಳೆತದೆಳೆಗಳ ಬಲ ಅದೆಷ್ಟು ಬಲವತ್ತರವಾದದ್ದೆಂದರೆ, ಒಳಗಿನ ಮನೋಬಲದ ಏನೆಲ್ಲಾ ನಿರ್ಧಾರ-ಶಕ್ತಿ-ಗಮನ-ಧ್ಯೇಯಾದಿಗಮ್
ಆದರೆ ಈ ಸೆಳೆತದ ಎಳೆದಾಟ ಯಾವ ಮೂಲದ್ದು ? ಎಂಬ ಸಂದೇಹ, ದ್ವಂದ್ವ ಕವಿಮನದ್ದು. ಅದೇನು ನಿಜಕ್ಕೂ ನಮ್ಮ ಜನ್ಮಜನ್ಮಾಂತರದ ಪಾಪ ಪುಣ್ಯಗಳ ಫಲಿತವಾಗಿ ದಕ್ಕುವ ಋಣಾಕರ್ಷಣೆಯ ಸೆಳೆತವೊ ? ಅಥವಾ ಆ ಸೋಗಿನಲ್ಲಿ ನಮ್ಮನ್ನು ಬಂಧಿಯಾಗಿಸಿ, ಕಟ್ಟು ಹಾಕಿಟ್ಟು ತನ್ನದೇನೊ ಬೇಳೆ ಬೇಯಿಸಿಕೊಳ್ಳುವ ಸೃಷ್ಟಿಯ, ವಿಧಿಯೊಳಗಿನ ತಂತ್ರಗಾರಿಕೆಯೊ?’ ಎನ್ನುವ ಗೊಂದಲ ಕವಿಯ ಅಂತರಾಳದಲ್ಲಿ ಗದ್ದಲವನ್ನೆಬ್ಬಿಸುತ್ತಿದೆ.
ಅದಕ್ಕೆ, ಯಾವುದೆ ಸೆಳೆತ-ಮೋಹಕ್ಕೆ ಸಿಲುಕಿಕೊಳ್ಳುವ ಮೊದಲು ಅದರ ನಿಜವಾದ ಉದ್ದೇಶವನ್ನು ಅರಿತು ನಂತರ ಮುಂದೆಜ್ಜೆಯಿಡಬೇಕೆನ್ನುತ್ತಾನೆ ಮಂಕುತಿಮ್ಮ. ಹಾಗೆ ಮಾಡುವುದರಿಂದ ಆ ಸೆಳೆತದಿಂದ ತಪ್ಪಿಸಿಕೊಂಡು ಹೊರಬರಲಾಗದಿದ್ದರು, ಅದನ್ನು ಸಮರ್ಥವಾಗಿ ನಿಭಾಯಿಸುವ ಮಾನಸಿಕ ಸಿದ್ದತೆಯಾದರೂ ಆದೀತೆನ್ನುವುದು ಇಲ್ಲಿನ ಮತ್ತೊಂದು ಅಂತರ್ಗತ ಆಶಯ.
#ಕಗ್ಗಕೊಂದು-ಹಗ್ಗ
#ಕಗ್ಗ-ಟಿಪ್ಪಣಿ
