ಧೋ! ಧುಮ್ಮಿಕ್ಕುವ ಜಲಪಾತ
ಧರೆಯ ಎದೆಯೊಳಗೆ
ನವರಸಗಳ ಅಖಂಡ ಜಾತ!
ಬಂಡೆ ಎದೆ ಹರವಿಗೆ ಬೆಣ್ಣೆ ತಿಕ್ಕಿ
ಬಿಗಿದಪ್ಪುವ ಬಯಕೆ ಬಿಸುಪಿಗೆ
ಕರಗಿ ಜಾರುವ ಹುಸಿ ನಾಚಿಕೆ ಮಾಟ|
ತೆರೆದ ಹೊಕ್ಕುಳಿಗೆ ಕಚಗುಳಿಯಿಡುವ
ಹನಿಗಳ ಕೂಟ ಸೃಜಿಪ ಮನ್ಮಥ ಚಾಪ
ಉರಿಗಣ್ಣ ತಣಿಪ ಶೃಂಗಾರನೋಟ || ೧ ||
ಶತಮಾನಗಳ ಕಂಡಜ್ಜಿಗೆ
ಮುಡಿ ಹರಡಿ ಸಿಕ್ಕು ಬಿಡೀಸುವ ತವಕ ನಿತ್ಯ
ಕಳೆದು ಹೋಗುವ ಋತುಮಾಸ |
ಕವಳ ಜಗಿದು ಕರೆಹಿಡಿದ ಕಲ್ಲು ಹಲ್ಲು
ಎಡೆಯಿಂದ ಸೀರುವ ಹನಿಹನಿ ಜೊಲ್ಲು
ಪ್ರಬುದ್ಧ ನಗೆಯ ನಿಬದ್ಧ ಹಾಸ || ೨ ||
ಪತನದರಿವಿಲ್ಲದ ಸ್ರೋತ
ಇನಿಯನೊಲವ ಕಡಲ ಕೂಡುವ ಸೆಳೆತ
ಅನಂಗನ ತೆವಲು ಬೆದೆಯ ಬಿನ್ನಾಣ |
ಪಾಪ ಹರಿದು ಬರುವ ಹೊಸ ಹೊಸ ಕನಸ
ನಿರಂತರ ನುಂಗುವ ಕ್ರೂರ ಪಾತ
ಕರುಳ ಹಿಂಡುವ ಕರುಣ ತಾಣ || ೩ ||
ಧೋ! ಧುಮ್ಮಿಕ್ಕುವ ಜಲಪಾತ
ತಲಾತಲ ತಲ ಸೀಳುವ ಛಲ
ಸವ್ಯಸಾಚಿಯ ನಾಚಿಸುವ ವೇಗ ಶರ |
ಬಂಡೆಯೆಡೆ ಹೆಬ್ಬಂಡೆ ಹೆಡೆಮೆಟ್ಟಿ
ಮರ್ದಿಸುವ ಭೀಮ ಬಲ
ರುದ್ರ ರಮಣೀಯ ದೃಶ್ಯಾಗಾರ || ೪ ||
ಚಿರಯೌವನದ ಬಿಸಿ ಪೌರುಷ ರಭಸ
ವ್ಯೂಹ ಭೇದಿಸಿ ಮುನ್ನುಗುವ ಸಾಹಸ
ನುಸುಳುವ ತಲೆ ತರಿದುರುಳಿಸುವ ರಚ್ಚು |
ಹರಿತ ಅಲಗು ಚೂಪು ಮೊನೆ ಎದೆ ಗುದ್ದು
ಎದ್ದು ನಿಲ್ಲುವ ಮೊದಲೇ ಮರ್ಮಕೊದ್ದು
ಸತತ ಧಾಳಿಯಿಡುವ ಪರಿ ವೀರ ಕೆಚ್ಚು || ೫ ||
ಧೋ! ಧುಮ್ಮಿಕ್ಕುವ ಜಲಪಾತ
ಗುಂಡಿಗೆ ಸದ್ದಡಗಿಸುವ ಭೋರ್ಗರೆತ
ಅಗಾಧ ಜಲರಾಶಿ ಹುಟ್ಟಡಗುವ ಗರ್ಭ |
ಪಾತಾಳ ದಾಳ ಬಾಯ್ದೆರೆದ ವ್ಯಾಪಿ
ಬೀಳುವದೆಲ್ಲವ ಮುಕ್ಕಿ ಡೊರೆಯುವ
ಬಲು ಭೀಕರ ಭಯಾನಕ ಗರ್ತ || ೬ ||
ಸುಪ್ತ ವಿಕೃತ ಕೆರಳುವ ವೈಯಾರದೋಕುಳಿ
ಸಂಗಕೆ ಕರೆವ ನೀರ್ಗುಳ್ಳೆ ಗೆಜ್ಜೆ ಕಜ್ಜಿ ತಳಿ
ಸೆರಗು ಜಾರಿಸಿ ಬೀಳಿಸುವ ಸೆಡವು |
ಅತೃಪ್ತ ಬಯಕೆ ಸುಳಿ ಬಿಚ್ಚಿ
ಎಡೆಬಿಡಿಸಿ ನುಗ್ಗುವ ಸೊಕ್ಕು ಸೆಳವು
ನಗ್ನ ಸಂಧಿಕೂಟ ಬೀಭತ್ಸ ಕನವು || ೭ ||
ಧೋ! ಧುಮ್ಮಿಕ್ಕುವ ಜಲಪಾತ
ತೃಷೆಯಾರದ ಬೊಗಸೆ ತುಂಬ ಎರೆಯುವ
ನೊರೆಹಾಲ ಧಾರೆ ಅನಾರತ ಅನಂತ |
ಆಹಾ ! ಏನದ್ಭುತ! ಏನದ್ಭುತವಿದು
ಇಳೆ ತಳೆದ ಘನ ಗಾಂಭೀರ್ಯ ಮೂರ್ತ
ಪ್ರಕೃತಿ ಚೇತನ ಮಿಲನ ಸಂಕೇತ || ೮ ||
ಮೂಲದಿಂದ ಕಡಲಕಡೆಗೆ ಪಯಣ
ಒಸರಿನೆಡೆಗೆ ಮತ್ತೆ ಸುಪ್ತ ಚಲನ
ಕಾಲ ಮೀಂಟಿದ ಶ್ರುತಿ ಜಗದ ಚೇತನ |
ಬದುಕು ಬಯಲಿನ ಪ್ರಣವ ನಾದ
ದಿವ್ಯ ಸುಳಿಯಲಿ ಲೀನ ನಿನಾದ
ಸತ್ಯ ಶಾಂತ ಆನಂದ ಧಾವನ || ೯ ||
ಧೋ ! ಧುಮ್ಮಿಕ್ಕುವ ಜಲಪಾತ
ಧರೆಯ ಎದೆಯೊಳಗೆ
ನವರಸಗಳ ಅನಾಹತ ಜಾತ ||
-ಕೇಶವ ಭಟ್ ಕಾಕುಂಜೆ
