ವರ್ಷ-ಹರ್ಷ

ಕಾದಿದೆ ಇಳೆಯು ಮಳೆಯ ಆಗಮನಕೆ
ಎಲ್ಲರ ಬಾಯಲ್ಲೂ ಒಂದೇ ಮಾತು
ಅಬ್ಬಬ್ಬಾ ಎಂಥಾ ಸೆಕೆ !
ಗ್ರೀಷ್ಮ ಕಳೆದು ವರ್ಷ ಬಂತು ||

ದೂರದಿ ಕೇಳುವ ಕಡಲ ಭೋರ್ಗರೆತ
ಧಾವಿಸಿತು ನೈಋತ್ಯ ಮಾರುತ |
ಯಾರೋ ಅತ್ತಿಸಿ ಬಂದಂತೆ ಓಡುವ ಮೋಡಗಳು
ನೀರ ಹನಿಗೆ ಹಾತೊರೆದಿವೆ ಜೀವ ಸಂಕುಲಗಳು ||

ಝಲ್ಲನೆ ಆಗಸ-ಭುವಿಯ ಬೆಳಗಿತು ಮಿಂಚು
ಅದನು ಮೀರಿಸಲು ಗುಡುಗಿನ ಸಂಚು |
ಬಾನಿನ ತುಂಬಾ ಕವಿಯಿತು ಕಾರ್ಮೋಡ
ಸುರಿಯಿತು ವರ್ಷಧಾರೆ ಧೋ ಎಂದು ನೋಡಾ ||

ಬಾಡಿದ ರೈತನ ಮೊಗದಲ್ಲಿ ಹರುಷ
ಮಾಡುವನು ಬಿತ್ತನೆ ತಡೆಯದೇ ನಿಮಿಷ |
ಹಚ್ಚಹಸಿರ ಚಾದಿರ ಧರೆಯ ಮುಚ್ಚಿತು
ಬಾಗಿ ನಿಂತವು ಗಿಡಗಳು ಹನಿಮುತ್ತ ಹೊತ್ತು ||