ಒಂದು ನಿಮಿಷವೂ ಸುಮ್ಮನೆ ಕೂರುತಿಲ್ಲ,
ಅದೇನನ್ನೋ ಹುಡುಕುತ ಕನವರಿಸುತಿದೆ,
ಎಲ್ಲವೂ ಇದೆಯಾದರೂ ಏನೂ ಇಲ್ಲವೆಂಬ ಭಾವ,
ಕನಸುಗಳ ಒರತೆ ಬತ್ತಿಹೋಗಿದೆ ನನ್ನಲಿ….!
ಎಲ್ಲರೂ ಜೊತೆಗಿದ್ದಾರೆ ಆದರೂ ನಾನು ತಬ್ಬಲಿ,
ಎಲ್ಲವೂ ದೊರೆತಿದೆ ಆದರೂ ಮನಸ್ಸಿಗೆ ಶಾಂತಿ ಇಲ್ಲ,
ಕಾಣದ ಕೈಯ್ಯೊಂದು ನನ್ನನು ಆಡಿಸುತಿದೆ,
ನನ್ನ ಆಸೆಗಳೇ ನನಗೆ ನೆನಪಿಲ್ಲದಂತಾಗಿದೆ….
ಆಧುನಿಕತೆ ನಿನ್ನ ಕರೆದವರಾರು, ಏಕೆ ನೀ ಜಗವ ಆವರಿಸಿದೆ,
ಬಂಧನಗಳೇ ಬಂಧುಗಳೇ ಇಲ್ಲದ ಜಗತ್ತಿನೊಳಗೆ,
ತಂತ್ರಜ್ಞಾನವೆಂಬ ಕಾಣದ ಕಣ್ಣುಗಳಿಂದ,
ಜಗವ ನೋಡುತಿಹೆನು ನಾನು…..
ಮೌಲ್ಯಗಳನು ಯಾರಿಗೆ ಮಾರಿದೆನೋ ನಾನು,
ಪ್ರೀತಿ ತೋರುವ ಮನಸಿಗೆ ಕತ್ತಲೆ ಆವರಿಸಿದೆ,
ಸತ್ವವಿಲ್ಲದೆ ಬದುಕುತಿರುವೆ ನಾನು,
ಅದೆಲ್ಲಿ ಮರೆಯಾದೆ ಓ ನನ್ನ ಚೇತನ.
