ಎಲ್ಲ ಮುಗಿದಿರುವಾಗ,
ಹೊಸದು ಕಾದಿರುವಾಗ,
ಹಳತೇ ಹೊನ್ನೆಂಬುದಿನ್ನೆಂಥ ಬ್ರಾಂತಿ!!!
ಹಳೆಕೊಳೆಯ ನೋಡುತ್ತ,
ಗತ ನೆನಪ ಜೀಕುತ್ತ,
ಕುಳಿತಿದ್ದರೆಂತು ಸಾಧ್ಯ? ಹೊಸ ಬೆಸುಗೆ – ಪ್ರೀತಿ…
ನನ್ನ ನಿಲುಕಿಗೆ ಸಿಗದ,
ದ್ವಂದ್ವ ನಿಲುವಿನ ಮನದ,
ನಿರ್ಧಾರಕಾರು ಹೊಣೆ, ಏನು ಗತಿ??
ಗಾಯ ಮಾದಿರುವಾಗ,
ಮನಸು ಮಾಗಿರುವಾಗ,
ಇನ್ನೇಕೆ ಆ ನೆನಪು, ಹಳೆ ಪ್ರೀತಿ – ಗೀತಿ…
ಕೊನೆಗೂ ಹೋದೆನು ಶರಣು,
ನಿನ್ನ ಪ್ರೇಮಕೆ ನಾನು,
ಸೆಳೆದು ಕೆಡವಿತು ನಿನ್ನ ಕಣ್ಣ ಕಾಂತಿ…
ಮುಳುಗಿ ತೇಲಿಹೆ,
ನವ ಪ್ರೇಮದಾ ಅಲೆಯಲ್ಲಿ,
ಮೂಡಿಹುದು ಹೊಸಕನಸು ಬೇರೆ ರೀತಿ…
ಬಿಟ್ಟೆನೆಂದರು ಬಿಡದ,
ಒಲವ ಮಾಯೆಯೇ ಜಗದ,
ಅಳಿಸಿ ನಗಿಸುವ ಅನುರಾಗ ಜ್ಯೋತಿ…
