ನಮ್ಮಿಬ್ಬರ ಜಗಳ ಕಂಡು
ತಲೆದಿಂಬುಗಳಲ್ಲಿ ತುಂಬಿದೆ
ದುಃಖ ಬರಪೂರ..
ಕಾರಣ
ಇಂದು ರಾತ್ರಿ ಒಂದಕ್ಕೊಂದು
ಅಗಲಿ ಮಲಗಬೇಕಾಗಿದೆ
ಬಲುದೂರ ದೂರ…!
***
ದೊಡ್ಡ ವೇದಿಕೆಯಲ್ಲಿ
ದೊಡ್ಡವರ ಸಣ್ಣತನದ
ವಿಚಾರಕ್ಕೆ
ಸಿಂಗರಿಸಿದ ವೇದಿಕೆ ಹೇಳಿತು
“ಬೇಗ ಕಳಚೀ ನನ್ನೀ ಅಲಂಕಾರ”..!
***
ಲತೆಯಿಂದ ಬೇರಾದ ಹೂ
ಹೆಣ್ಣ ಮುಡಿ ಏರಿದರೇನು
ದೇವರ ಅಡಿ ಸೇರಿದರೇನು..
ಇಬ್ಬರೂ ಕೊಡರು ಸಾಂತ್ವಾನ
ಅಗಲಿದ ಹೂವಿನ ನೋವಿಗೆ..!
***
ನೀನು ನಕ್ಕಾಗಲೆಲ್ಲಾ
ಚಂದ್ರನಿಗೆ ಮುನಿಸು..!
ಕಾರಣ
ಎಲ್ಲಾ ತಾಯಂದಿರು
ತೋರಿಸುವರು
ತಮ್ಮ ಮಕ್ಕಳು ಅತ್ತಾಗ
ನಿನ್ನನ್ನೇ..!
***
ನಾನು, ನಾನೇ, ನನ್ನಿಂದಲೇ..
ಎನ್ನುವ ನೀನು
‘ನಾ’ ತೆಗೆದು ‘ನೀ’ ಇಟ್ಟು ನೋಡು
ಅವನೂ ಮೆಚ್ಚುವ
‘ನಾ’ ಇಲ್ಲದ ‘ನೀ’ ನನ್ನು..!
***
ಹರಿವ ಹಾವ ಭಯವಿಲ್ಲದ
ಉರಿವ ಉರಿಯ ಭಯವಿಲ್ಲದ
ಕಪ್ಪು ಕತ್ತಲ ಭಯವಿಲ್ಲದ
ಮಗುವ ಮಾಡು ತಂದೆ
ನಿನ್ನ ಭಯವೂ ಇಲ್ಲದೆ
ಪ್ರೀತಿಯಿಂದಿರುವೆ ಶ್ರೀ ಗುರು ಕೊಟ್ಟೂರೇಶ..!
***
ಮಿಂಚು ಮಿಂಚ ಬೇಕಾದರು
ಬಿಳಿ ಮೋಡಗಳು
ಕಪ್ಪಾಗಲೇ ಬೇಕು,
ಸೂರ್ಯ ಕಾಣ ಬೇಕಾದರೂ
ಕಪ್ಪುದಾರಿಯ ಹಾದು ಬರಲೇಬೇಕು…!
