ಕಲೆಯ ಮುನ್ನುಡಿ

ನಡುತಿಮಿರ ಪರದೆಯೆಳೆ

ಸುಡುರಂಗ ನಿಗಿನಿಗಿಸೆ

ಹಿಡಿಜೀವವೊಂದಿಲ್ಲಿ ಕುಣಿಯಲೆದ್ದು |

ಜಡ ಮುರಿದು ಬಯಲಲ್ಲಿ

ಅಡಿ ಮೇಲೆ ಹಾರಿರಲು

ಬಡಿದಂತೆ ಮಾರ್ದನಿಸಲದುವೆ ಸದ್ದು ||

ಬಣ್ಣಗಳ ಲೇಪದಲಿ

ಕಣ್ಣುಗಳೆ ದನಿಯಾಗೆ

ತಣ್ಣನೆಯ ಛಳಿಯೆಲ್ಲ ಧೂಳಿಪಟವೆ |

ಬಣ್ಣನೆಗೆ ದಂಡವದು

ಹುಣ್ಣಿಮೆಯೆ ಕಂದಿರಲು

ನುಣ್ಣನೆಯ ಹಾಳೆಯಲಿ ಚಿತ್ರಪಟವೆ ||

ಬಿಳಲುಗಳನಡಗಿಸಿದ

ಪುಳಕಿತವು ಭರಪೂರ

ಗಳಿಸಿರಲು ಸಭೆತುಂಬ ಕರತಾಡನ |

ಹಳೆಹಳಿಯ ಪಯಣಿಗನೊ

ಸುಳುಹಿಂದ ಕಲ್ಪನೆಯೊ

ತಳಪಾಯ ಗುರುತರದೆದೆಯಭಿಯಾನ ||

(ಇದು ಕುಸುಮ ಷಟ್ಪದಿಯಲ್ಲಿದೆ . ಕುಸುಮ ಷಟ್ಪದಿಯಲ್ಲಿ ಆರು ಪಾದಗಳಿರುತ್ತವೆ. 1,೨,೪,೫ನೆಯ ಸಾಲುಗಳು ಸಮನಾಗಿದ್ದು, ೫ ಮಾತ್ರೆಯ ಎರಡು ಗಣಗಳಿರುತ್ತವೆ. ೩ ಮತ್ತು ೬ನೆಯ ಪಾದಗಳಲ್ಲಿ ೫ ಮಾತ್ರೆಯ ೩ ಗಣಗಳಿದ್ದು,ಕೊನೆಯಲ್ಲಿ ಒಂದು ಗುರು ಬರುತ್ತದೆ(ಲಘು ಬಂದರೂ ಗುರು ಎಂದುಕೊಳ್ಳಬೇಕು. 

ಗುರುಬಸವನ(೧೪೩೦)’ಮನೋವಿಜಯ‘ಕಾವ್ಯ   ಕುಸುಮ ಷಟ್ಪದಿಯಲ್ಲಿದೆ_)