ತೊರೆದು ಹೊರಟಿಹ ನಿನ್ನ ತಡೆದು ನಿಲ್ಲಿಸಲಾರೆ
ಕಡೆಯ ಮಾತನಾದರೂ ನಡೆಸಿ ಹೋಗು.
ನೀನಿರದ ಕನಸನು ಕಾಣುವ ಬಗೆಯನು
ಸೋತಿರುವ ಹೃದಯಕೆ ಕಲಿಸಿಹೋಗು.
ನಿನ್ನದೇ ನಿರೀಕ್ಷೆಯಲಿ ಪರಿತಪಿಸುತಿಹ ಮನಕೆ
ಮರಳಿಬಾರೆಯೆಂಬ ನಿಜವ ತಿಳಿಸಿಹೋಗು.
ನಾ ನಡೆವ ದಾರಿಯಲಿ ಹಿಂದೊಮ್ಮೆ ಜೊತೆಯಲ್ಲಿ
ನೀನಿದ್ದ ನೆನಪನ್ನು ಅಳಿಸಿಹೋಗು.
ಒಲಿದ ನಿನ್ನೆಯ ಒಲವ ಕಳಕೊಂಡ ಆ ಕ್ಷಣದ
ಮರೆಯಲಾಗದ ನೋವ ಮರೆಸಿಹೋಗು.
ಜೊತೆಯಾಗಿ ನೀನಿರಲು ಅತಿಚಿಕ್ಕ ಖುಷಿಯಲ್ಲೂ
ಮೈಮರೆತು ಸಂಭ್ರಮಿಸೊ ಆ ನಲಿವನು
ಮೊಗದಲ್ಲಿ ಹಾಗೆಯೇ ಉಳಿಸಿಹೋಗು.
