ನನ್ನದೆಂಬುದೇನಿಲ್ಲ
ಎಲ್ಲವೂ ನಿನ್ನದಾಗಿರುವಾಗ||
ಪ್ರತಿ ಹೆಜ್ಜೆ ನಿನ್ನತ್ತ ಸುಳಿವುದು
ಹೊಸ ಚೇತನ ಎನ್ನೊಳುದಿಪುದು
ಈ ತನುವು ತನ್ನ ತಾ ಮರೆವುದು
ತನ್ನಿದಿರು ತನ್ನಂತರಂಗವಿರಲು||
ಗಂಭೀರದಾ ಮೊಗದಲೂ ಕೂಡ
ಬರವಿಲ್ಲದ ಮುಗುಳ್ನಗೆಯು ಸದಾ
ಮುಖಕಮಲ ಹಿಗ್ಗಿ ಪಲ್ಲವಿಪುದು
ನಿಶೆಯಲೂ, ನಿನ್ನ ನೆನಪಾಗಲು||
ಅಳುವನೆಂದಿಗೊ ಮರೆತಿಹೆನು
ಕೋಪವೆನ್ನನು ತ್ಯಜಿಸುಹುದು
ಭಾವಲೋಕದಿ ವಿಹರಿಸುತಿಹೆನು
ಮನದಧಿಪತಿಯು ನೀನಾಗಿರಲು||
ನನ್ನ ತಿದ್ದುವ ಗುರುವೂ ನೀನು
ಬಾಳ ನೆಚ್ಚಿನ ಸ್ನೇಹಿತನು
ಮನದ ದುಗುಡಗಳೆಲ್ಲ ಕಳೆವ
ಸಕಲ ಸಂತೋಷದ ಗಣಿಯು
ಕನಸಗೋಪುರದ ಕಳಸ ನೀನು
ನನಸಲಿ ನೀ ಎನ್ನ ದಿಶೆಯು
ಅಣು ಅಣುವಿನ ಜೀವರಾಶಿ
ಪ್ರತಿ ಬಡಿತದ ಮಿಡಿತವೂ ನೀ||
ನನ್ನದೆಂಬುದೇನಿಲ್ಲ
ಸರ್ವಸ್ವವೂ ನೀನಾಗಿರುವಾಗ||
ಪುಟ್ಟ ಮನದಿ ಹಿರಿದಾದ ಪ್ರೀತಿ
ಅರ್ಪಿಸುವೆನು ನನ್ನೊಲವಿಗೆ
ಅರಿಯೆನು ಬೇರಾವ ಭಾವಗಳ
ಸಮರ್ಪಣಾ ಭಾವದ ಹೊರತು….,||
Varija Hebbar
varija.v.h2011@gmail.com
