ನೀರವತೆಯಲಿ ಪವಡಿಸಿದ್ದ ನೆಲವ
ತೋಯಿಸಿದೆ ಲೋಹಿತ ರಕ್ತತೈಲ;
ರವಿಯೂ ಹೇಸಿಗೆಯಿಂ ಮಂದನಾದ
ಭುಗಿಲೇಳಲು ಕ್ರೌರ್ಯದ ರಣಜ್ವಾಲಾ||
ಲವಲೇಶವೂ ಇರಲಿಲ್ಲ ಆ ದೀನಕಂಗಳಲಿ
ರುದಿರಕೋಡಿ ಕಾಣುವ ರಣಕಲ್ಪನೆ;
ಇನ್ನೂ ಅರಳದ ಕುಟ್ಮಲಗಳನು
ಬೂದಿಯಾಗಿಸಿತು ರಣೋಪಾಸನೆ||
ಅನುದಿನ ಲೋಹಿತ ಧುನಿಯದೇ ಚಿತ್ರಣ
ವಿರಮಿಸಿದ್ದವು ಕ್ಷಣ ಎಳೆರೆಪ್ಪೆಗಳು;
ಹೊಂಗನಸ ತೆರೆ ಸರಿಸಿ ಅನಂತನಿಶೆಯ
ದರ್ಶಿಸಿದವು ವಿಕೃತ ಅಧಮಾತ್ಮಗಳು||
ಶತಕಗಳಿಂದ ಗುಂಡೇಟಿನದೇ ಸುಪ್ರಭಾತ
ತುಡಿತವಿದೋ ಕ್ಷಣ ಮೌನಕೆ;
ಆವರಿಸಿಹ ಲೋಹಿತ ನೆತ್ತರ ಕಲೆಗಳ
ಅಳಿಸುವ ಶಾಂತಿಯ ಸಿಂಚನಕೆ||
ಅಂತವೆಂದು ಈ ಕ್ರೂರ ವಿಪ್ಲವಕೆ
ಕಾದಿದೆ ವಿಶ್ವದ ಅಣುಅಣುವೂ;
ಕ್ರೌರ್ಯದ ಕರಿಪತಾಕೆ ಕಿತ್ತೆಸೆದು
ಧವಲ ಧ್ವಜ ಕಾಣ್ವ ದೀನ ಹಂಬಲವು||
Facebook ಕಾಮೆಂಟ್ಸ್