ಸುಬ್ಬಂಣನ ತ್ರಿಪದಿಗಳು

೧. ದಕ್ಕದಿರೆ ಮಂತ್ರಿಪದ | ಪಕ್ಷವನು ತೊರೆಯುವರು
ಉಕ್ಕಿ ಹರಿಯುವ ದೇಶಭಕ್ತಿಗಿದು ಬಲುದೊಡ್ಡ
ಸಾಕ್ಷ್ಯ ನೋಡೆಂದ ಸುಬ್ಬಂಣ ||

೨.ಬೆಕ್ಕಿಂಗೆ ಹಾಲೆರೆಯೆ |ನೆಕ್ಕದಿರ್ಪುದೆ ಇರುವೆ
ಸಕ್ಕರೆಯ ಕಂಡು ತಾ ಮೆಲದಿಹದೆ ಕೊಡೆ ಲಂಚ
ಮುಕ್ಕದವರಾರು ಸುಬ್ಬಂಣ ||

೩.ಕಂಬವೇ ಕೈಯೊಡ್ಡಿ | ತಿಂಬ ಕಾಲವು ಬಂತು
ತುಂಬಿ ಭ್ರಷ್ಟಾಚಾರ ದೇಶದಲಿ ಸುಜನರಿಗೆ
ಕಂಬನಿಯದಾಯ್ತು ಸುಬ್ಬಂಣ ||

೪.ಉಂಬಾಸೆ ಬಡವಂಗೆ | ಕೊಂಬಾಸೆ ಧನಿಕಂಗೆ
ತುಂಬು ಜವ್ವನೆಯಾಸೆ ವಿಟಗೆ ಜಿಪುಣಗೆ ಹಣವ
ತುಂಬಿಕೊಳುವಾಸೆ ಸುಬ್ಬಂಣ ||

೫.ಸಂತರನು ದೂಷಿಪಗೆ | ಪಂಥವನು ಮುರಿದವಗೆ
ಹಂತಕಗೆ ದುರ್ನಡತೆಯವಗೆ ಲೋಭಿಗೆ ಜಗದಿ
ಶಾಂತಿ ಸಿಗಲುಂಟೆ ಸುಬ್ಬಂಣ ||

.Balnad Subbanna Bhat

Facebook ಕಾಮೆಂಟ್ಸ್