ಬಲ್ಮೆ

ನಿನ್ನ ಉದರದ ವಿಶದ ಸರಸಿಯಲಿ

ಕುಮುದ ಕುಡ್ಮಲವಾಗಿ ನಲಿದಿರುವೆ;

ಅಲರಾಗಿ ಸುಗಂಧ ಬೀರಿ

ಅಲಂಪು ನೀಡುವ ಕನಸ ಹೊತ್ತಿರುವೆ…

ನಿನ್ನ ಬೆಚ್ಚನೆ ಪವಿತ್ರ ಗರ್ಭದೊಳು

ಮುಗ್ಧ ಸ್ವಪ್ನಗಳ ಕಾಣೋ ಎಳೆಗೂಸು ನಾ;

ಮುಂದೆ ಹೆಣ್ಣಾಗಿ, ಬಾಳಿನ ಕಣ್ಣಾಗಿ

ಬಾಳಲಿರುವುದೇ ಧನ್ಯ ಜೀವನ…

ಅಮಲ ಚಿತ್ತದ ರುಚಿರ ಪ್ರೇಂಖದಲಿ

ಅಂಚಿತ ಸುಮಗಳ ಅರಳಿಸುವಾಸೆ;

ವಿಕೃತ ಜಗದ ತೆರೆಯನು ಸರಿಸಿ

ಕಾಂಚನ ದೀಧಿತಿ ಬೀರುವ ಕನಸೇ…

ಅಧ್ವಾನ ಪಥದಲಿ ಸೋತು ಸಾಗುವ

ರಿಕ್ತ ಮನಗಳಿಗೆ ಸಖಿಯು ಆಗುವೆ;

ಅರಿವಿನ ಆಸರೆ ಸತತ ನೀಡುತಾ

ಸ್ಫೂರ್ತಿಯಾಗಿ ರೂಪ ಪಡೆವೆ…

ಸಾವಿರ ಕನಸು ಹೊತ್ತ ಮೊಗ್ಗು ನಾನು

ಅರಳುವ ಮುನ್ನ ಹೊಸಕಿ ಹಾಕದಿರು;

ಹೆಣ್ಣು ಎಂಬ ಏಕ ಹೇತುವಿಂದ

ಕಣ್ದೆರೆವ ಮುನ್ನ ಕತ್ತಲ ದರ್ಶಿಸದಿರು…

ಲೋಕಕೆ ಹೆಣ್ಣು ಅತುಲ ಬಲ್ಮೆ

ನನ್ನನ್ನು ಹೆತ್ತು ಧನ್ಯಳಾಗು;

ಕ್ರೂರ ಜಗದ ಕೋಟಿ ಮೂಢರಿಗೆ

ಒಲುಮೆಯ ಸಾಕಾರ ಸ್ಫೂರ್ತಿಯಾಗು…

Facebook ಕಾಮೆಂಟ್ಸ್

Kavana V Vasishta: An Akashavani artist, loves reading novels and have published a book "Anthargami"

ಗೆದ್ದಲು
ಚಿಗುರುವುದನ್ನೇ ಮರೆತ ಬೋಳುಮರ ಹೂವು ಹಣ್ಣು ತಳೆದು ಹಕ್ಕಿಗಳ ಹೊಟ್ಟೆ ತಣಿಸಿ ಎಷ್ಟು ಯುಗವಾಯ್ತು ಕಾದಿರುವೆ ಹಗಲಿರುಳು ಬೇರುಗಳ ನೆನೆಸಿ…
ಅದೊಂದು ದಿನ
ಅದೊಂದು ದಿನ- ಅಂದೂ ತೊಳೆದಿಟ್ಟ ಹಾಗೆ ಆಕಾಶ ಅಥವಾ ಅಲ್ಲಿ ಇಲ್ಲಿ ಒಂದೆರಡು ಖಬರುಗೇಡಿ ಮೋಡ ಸುಮ್ಮನೆ ರೆಕ್ಕೆಯೂ ಅಲುಗದೆ…
ನಡೆ ನೀನು‌ ನಡೆ!
ಭಾವ ಬಂಧನದ ಮೇರೆ ಮೀರಿ, ನೂರಾರು ಕನಸುಗಳ ಕೋಟೆ ದಾಟಿ, ಹೊರಟಿದೆ‌‌ ಪಯಣ, ಗಮ್ಯದ ಕಡೆ ಗಮನ! ಅಂತ್ಯವ…