೦೫೧. ಬಾಹ್ಯಾಡಂಬರದ ಬೆಡಗಿನ ಬಿಗಿ ಕಟ್ಟಿನಲಿ ಸಿಕ್ಕಿಬಿದ್ದ ಜೀವದ ಪಾಡು..

ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೫೧:

ಸೆಳೆಯುತಿರ್ಪುವದೊಂದು ಹೊರಬೆಡಗಿನೆಳೆಗಳೆ |

ನ್ನೊಳಗಿನಸುವೆಲ್ಲವನು ಕಟ್ಟಿನಿಂ ಬಿಗಿದು ||

ಎಳೆದಾಟವೇಂ ಋಣಾಕರ್ಷಣೆಯೋ ? ಸೃಷ್ಟಿ ವಿಧಿ |

ಯೊಳತಂತ್ರವೋ ? ನೋಡು – ಮಂಕುತಿಮ್ಮ || ೦೫೧ ||

ನಾವೆಲ್ಲ ಅಸಾಧಾರಣ ಅಂತಃಶಕ್ತಿಯ ವರ ಪಡೆದು ಭುವಿಗಿಳಿದ ಜೀವಿಗಳೆ.. ಆದರೆ, ನಮ್ಮೊಳಗಿನ ಅದ್ಭುತ ಸಾಮರ್ಥ್ಯವನ್ನೆಲ್ಲ ಕಬಳಿಸಿ ನುಂಗಿಹಾಕುತ್ತಿದೆಯಂತೆ ಬಾಹ್ಯ ಜಗದಾಕರ್ಷಣೆಯ ಹುಸಿ ಮಾಯೆಯ ಬೆಡಗು.  ಗೊತ್ತಿದ್ದೂ ಗೊತ್ತಿದ್ದೂ ಆ ಬಲೆಯಡಿ ಸಿಲುಕಿ ಅಸಹಾಯಕವಾಗುವ ಹುಲು ಮಾನವ ಜೀವಿಯ ಒದ್ದಾಟದ ಪರಿ ಇಲ್ಲಿ ಪ್ರಕಟವಾಗಿದೆ.

ಹೊರ ಜಗತ್ತಿನ ಸೆಳೆತವೆನ್ನುವುದು ಸಾಧಾರಣ ಸರಕಲ್ಲ. ಆ ಬಾಹ್ಯದ ಏನೇನೊ ಬೆಡಗು, ಆಕರ್ಷಣೆಗಳ ಹಲವಾರು ಎಳೆಗಳು ಬಂಧ-ಬಾಂಧವ್ಯಗಳಾಗಿಯೊ, ಮೋಹ-ದಾಹಗಳಾಗಿಯೊ, ಆಸೆ-ಪ್ರಲೋಭನೆ-ಪ್ರಚೋದನೆ-ಕೀರ್ತಿ-ಕಾಮನೆಗಳಾಗಿಯೊ – ಹೀಗೆ ಯಾವುದಾದರೊಂದು ಬಗೆಯ ಸೆಳೆತದ ನೂಲಿನೆಳೆಯಾಗಿ ಕಾಣಿಸಿಕೊಂಡು ನಮ್ಮೊಳಗಿನ ಅಸು (ಪ್ರಾಣ), ಆಸಕ್ತಿ, ಗಮನವೆಲ್ಲವನ್ನು ತನ್ನ ಬಂಧದಲ್ಲಿ ಬಿಗಿಯಾಗಿ ಬಿಗಿದು ಕಟ್ಟಿ ಕಾಡುತ್ತದಂತೆ.

ಸೆಳೆಯುವ ಈ ಸೆಳೆತದೆಳೆಗಳ ಬಲ ಅದೆಷ್ಟು ಬಲವತ್ತರವಾದದ್ದೆಂದರೆ, ಒಳಗಿನ ಮನೋಬಲದ ಏನೆಲ್ಲಾ ನಿರ್ಧಾರ-ಶಕ್ತಿ-ಗಮನ-ಧ್ಯೇಯಾದಿಗಮ್ಯಗಳನ್ನು ಮೂಲೆಗೊತ್ತಿಸಿ, ವ್ಯಕ್ತಿಯನ್ನು ತನ್ನ ಸೆಳೆತದ ಅಡಿಯಾಳಾಗಿಸಿಕೊಂಡುಬಿಡುವಷ್ಟು.. ಎಂತಹ ಜಿತೇಂದ್ರಿಯರು ಅದರಿಂದ ತಪ್ಪಿಸಿಕೊಳ್ಳಲಾಗದೆ ‘ಎಲ್ಲಾ ವಿಧಿಯಾಟ, ಋಣ ಭಾರ’ ಎಂದಂದುಕೊಂಡು ಸೋತು ಶರಣಾಗಿಬಿಡುವಷ್ಟು, ಅದರ ಪ್ರಭಾವ ಕಾಡುತ್ತದಂತೆ.

ಆದರೆ ಈ ಸೆಳೆತದ ಎಳೆದಾಟ ಯಾವ ಮೂಲದ್ದು ? ಎಂಬ ಸಂದೇಹ, ದ್ವಂದ್ವ ಕವಿಮನದ್ದು. ಅದೇನು ನಿಜಕ್ಕೂ ನಮ್ಮ ಜನ್ಮಜನ್ಮಾಂತರದ ಪಾಪ ಪುಣ್ಯಗಳ ಫಲಿತವಾಗಿ ದಕ್ಕುವ ಋಣಾಕರ್ಷಣೆಯ ಸೆಳೆತವೊ ? ಅಥವಾ ಆ ಸೋಗಿನಲ್ಲಿ ನಮ್ಮನ್ನು ಬಂಧಿಯಾಗಿಸಿ, ಕಟ್ಟು ಹಾಕಿಟ್ಟು ತನ್ನದೇನೊ ಬೇಳೆ ಬೇಯಿಸಿಕೊಳ್ಳುವ ಸೃಷ್ಟಿಯ, ವಿಧಿಯೊಳಗಿನ ತಂತ್ರಗಾರಿಕೆಯೊ?’ ಎನ್ನುವ ಗೊಂದಲ ಕವಿಯ ಅಂತರಾಳದಲ್ಲಿ ಗದ್ದಲವನ್ನೆಬ್ಬಿಸುತ್ತಿದೆ.

ಅದಕ್ಕೆ, ಯಾವುದೆ ಸೆಳೆತ-ಮೋಹಕ್ಕೆ ಸಿಲುಕಿಕೊಳ್ಳುವ ಮೊದಲು ಅದರ ನಿಜವಾದ ಉದ್ದೇಶವನ್ನು ಅರಿತು ನಂತರ ಮುಂದೆಜ್ಜೆಯಿಡಬೇಕೆನ್ನುತ್ತಾನೆ ಮಂಕುತಿಮ್ಮ. ಹಾಗೆ ಮಾಡುವುದರಿಂದ ಆ ಸೆಳೆತದಿಂದ ತಪ್ಪಿಸಿಕೊಂಡು ಹೊರಬರಲಾಗದಿದ್ದರು, ಅದನ್ನು ಸಮರ್ಥವಾಗಿ ನಿಭಾಯಿಸುವ ಮಾನಸಿಕ ಸಿದ್ದತೆಯಾದರೂ ಆದೀತೆನ್ನುವುದು ಇಲ್ಲಿನ ಮತ್ತೊಂದು ಅಂತರ್ಗತ ಆಶಯ.

#ಕಗ್ಗಕೊಂದು-ಹಗ್ಗ

#ಕಗ್ಗ-ಟಿಪ್ಪಣಿ

Facebook ಕಾಮೆಂಟ್ಸ್