ಬದುಕೆಂದರೆ ಹೀಗೆ..
ಬಗೆಬಗೆಯ ಭಾವಗಳ ಬೇಗೆ.!
ಒಮ್ಮೆ ಮನವರಳಿಸುವ
ತುಂಬಿರುವ ಸಂಭ್ರಮ..
ಮತ್ತೆ ಮನವನಳಿಸುವ
ಹುಚ್ಚು ಭ್ರಮನಿರಸನ.!
ಮುನ್ನಡಿಯಿಡಲಾರದಂತೆ
ಕಣ್ಣು ಮಬ್ಬಾಗಿಸುವ ಕತ್ತಲು..
ಮತ್ತೆಲ್ಲೋ ಮೂಡಿ ಬರುವ
ಭರವಸೆಯ ಬೆಳಕ ಹೊನಲು.!
ತತ್ತರಿಸಿರುವ ಬದುಕಿಗಾಗಿ
ವಿಧವೆಯರ ಅರಚಾಟ..
ಹೊಸತನದ ಭವಿಷ್ಯದೆಡೆ
ನವ ಮುತ್ತೈದೆಯ ನೋಟ.!
ಒರಗಿದರೂ ನಿದಿರೆ ಕೊಡದ
ಸಿರಿತನದ ಮೃದು ಹಾಸಿಗೆ..
ಹರಕು ಚಾಪೆಯ ತಿರುಕನಿಗೆ
ನಿದ್ರಾದೇವಿಯ ಅಪ್ಪುಗೆ.!
ಬರಡು ಕೊಂಬೆಯ ಚಿಗುರಿಸಲು
ಹಲವು ಮನಸುಗಳಿಗೆ ತವಕ..
ಎಳೆಚಿಗುರು ಚಿವುಟುವುದು
ಕೆಲವರಿಗಂತೂ ವಿಕೃತ ಸುಖ.!
ಸಾವಲ್ಲೂ ನಗುತಿರುವ
ಸಾವಿಗಿನಿತೂ ಅಂಜದವರು..
ಬದುಕಿಯು ಸತ್ತಂತಿರುವ
ಬದುಕ ಪ್ರೀತಿಸದವರು..!
ಏರಿಳಿತಗಳ ಈ ಜೀವನದ ಪಯಣ
ಸೃಷ್ಟಿ ರೂಪಿಸಿದ ಅಲಿಖಿತ ನಿಯಮ..!
Facebook ಕಾಮೆಂಟ್ಸ್