ಮಲ್ಲಿಗೆ ಮತ್ತು ನನ್ನ ಮುಗುದೆ

ನಿಶೆಯ ರಾತ್ರಿಗೆ ಬಳ್ಳಿ ನಲ್ಲೆಯನು ಬಳಿಕರೆದು

ನಿನಗೆಂದು ನಾಳೆ ಹೂ ಮುಡಿವೆನೆಂದು;

ಪಿಸುನುಡಿವ ದನಿಯನ್ನು ಆಲಿಸುವ ನನ್ನಿಂದ

ಮಲ್ಲೆ ಹೋದಳು ದೂರ ಮುನಿಸಿಕೊಂಡು.

ಮುನಿಸಿಕೊಂಡರೆ ಅವಳು, ನನಗೆ ಮಾತುಗಳಿಲ್ಲ

ನನ್ನ ಮೌನಕ್ಕವಳು ಸುಮ್ಮನಿರಳು;

ಹೇಗೆಯೋ ಸಂತೈಸಿ ಮತ್ತೆ ನಗುವನು ಹರಸಿ

ಮಲ್ಲೆ ಮಾತನು ತುಂಬಿ ಹರಸುವವಳು.

ಇಂಥ ಒಲವನು ನೋಡಿ, ಮಲ್ಲಿಗೆಯ ಬಳ್ಳಿಯಲಿ

ಜೋಡಿ ಹೂಗಳು ನಾಳೆ ಅರಳದಿಹುದೇ?

ಅರಳಿರುವ ಮಲ್ಲಿಗೆಯು ನಗುವ ಚಂದವೆ ಸಾಕು

ನನ್ನ ಮಲ್ಲಿಗೆ ಮತ್ತು ನನ್ನ ಮುಗುದೆ!

Photo by Sanath’s

Facebook ಕಾಮೆಂಟ್ಸ್