ಅತ್ತವಳೆ ನೇತ್ರಾವತಿ ಗೊಳೋ
ಬೆತ್ತಲೆ ನೆಲವಾಗೊ ಸಂಕಟಕೆ
ತಂದಿಕ್ಕಿದೆ ಆತಂಕ ಭವಿತದ ರಚ್ಚೆ
ಭೀತಿ ಎತ್ತಿನ ಹೊಳೆಯಲಿ ಕೊಚ್ಚೆ..
ಜೀವನಾಡಿಯಾದವಳು ಮಾತೆ
ಕರಾವಳಿಗವಳು ಕನ್ನಡಿಯಂತೆ
ಕಣ್ಣಾಗ್ಹರಿಸಿಹಳು ಜೀವ ಜಲಧಾರೆ
ನೇತ್ರದಿ ನೆತ್ತರ ಹರಿಸೆ ದಿಕ್ಕಿನ್ಯಾರೆ ?
ಧರ್ಮಸ್ಥಳದಲಿ ಮುಳುಗು ಹಾಕಿ
ಮೀಯುವ ಭಕ್ತರ ತೋಯಿಸೊ ಶಕ್ತಿ
ಬತ್ತಿಸೆ ಪಾತ್ರ ಕುಗ್ಗಿ, ಮಬ್ಬುಕಣ್ಣ ಮಂಜೆ
ತೊಳೆಯಲ್ಯಾರ ಸೊರಗೆ, ನಾನಾಗೆ ಬಂಜೆ ?
ಕುಡಿಕುಡಿದು ಜನಮನ ಸುತ್ತಲ ನಿಸರ್ಗ
ಮಾಡಿಲ್ಲವೆ ಪ್ರಕೃತಿಯ ಅವನಿಯ ಸ್ವರ್ಗ ?
ಬೇಕೇಕೆ ಸಹಜವ ಕೆಡಿಸೊ ಸಂಚಿನ ಮೇಳ
ಬಲಿಯೇಕೆ ಸ್ವಾರ್ಥಕೆ ಯೋಜನೆ ಖೂಳ ?
ಬಿಡಿರಯ್ಯ ಹೊಳೆ ನದಿ ನಾಡಿನ ಮಾತೆ
ಬಾಯ್ಮುಚ್ಚಿಸುವುದಲ್ಲ, ಬರಿ ವಾದದ ಮಾತೆ
ಕೈಗೂಡಿಸಲಿದ್ದರೆನ್ನ ಉಳಿಸಿ ಬೆಳೆಸಿ ಸಲಹಿ
ಕಾಡದೆ ದೂರವಿದ್ದರು ಸರಿ, ಪೊರೆವೆ ರಕ್ಷಿಸಿ.
